ព្រឹកថ្ងៃ ៨ រោច ខែស្រាពណ៍ ឆ្នាំកុរ ឯកស័ក ព.ស ២៥៦៣ ត្រូវនឹងថ្ងៃទី២៣ ខែសីហា ឆ្នាំ២០១៩ នៅសាលាឃុំមេលំ ស្រុកបរិបូណ៌ មានរៀបចំវេទិកាសាធារណៈក្រុមការងារថ្នាក់ជាតិចុះមូលដ្ឋាន ដើម្បីត្រួតពិនិត្យ និងគាំទ្រការអនុវត្តកម្មវិធីនយោបាយ និងយុទ្ធសាស្ត្រចតុកោណដំណាក់កាលទី៤ របស់រាជរដ្ឋាភិបាល និងពិនិត្យ ដោះស្រាយបញ្ហាប្រឈម និងសំណូមពររបស់ប្រជាពលរដ្ឋនៅមូលដ្ឋាន ក្រោមអធិបតីភាព លោកជំទាវ ឆាយ វ៉ាន់នឿន រដ្ឋលេខាធិការទីស្តីការគណៈរដ្ឋមន្ត្រី និង ជាប្រធានក្រុមការងារថ្នាក់ជាតិចុះមូលដ្ឋានស្រុកបរិបូណ៌ និងមានការអញ្ជើញចូលរួមពីឯកឧត្ដម លោកជំទាវរដ្ឋលេខាធិការ អនុរដ្ឋលេខាធិការ, ឯកឧត្ដម អម សុភា អភិបាលរងខេត្ត ក្រុមការងារថ្នាក់ជាតិ ថ្នាក់ខេត្ត ស្រុកចុះមូលដ្ឋានស្រុកបរិបូណ៌ ក្រុមប្រឹក្សាឃុំ អាជ្ញាធរភូមិ និងប្រជាពលរដ្ឋ មកពីឃុំចំនួន៣ មានឃុំផ្សារ ឃុំមេលំ និង ឃុំកំពង់ព្រះគគីរ ដែលមានអ្នកចូលរួមសរុប ៣៧២ នាក់ ស្រី ១៤៥ នាក់។
សំណួរ និងសំណូមពរដែលទទួលបានសរុបមានចំនួន ៩ចំណុច ពាក់ព័ន្ធនឹងប្រព័ន្ធធារាសាស្ត្រ ប្រឡាយទឹក ហេដ្ឋារចនាសម្ព័ន្ធផ្លូវថ្នល់ បញ្ហាព្រំប្រទល់ឃុំ និងបញ្ហាផ្សេងៗមួយចំនួនទៀត។ លោកជំទាវប្រធានក្រុមការងារ និងឯកឧត្ដម លោកជំទាវ អនុប្រធានក្រុមការងារ និងសមាជិកក្រុមការងារ ព្រមទាំងមន្ទីរជំនាញ បានខិតខំពន្យល់ បកស្រាយ និងពិភាក្សារិះរកវិធីសាស្ត្រដោះស្រាយជូនប្រជាពលរដ្ឋបានស្ងប់ចិត្ត និងទទួលយកដោយក្ដីសប្បាយរីករាយ។ បញ្ហាមួយចំនួនដែលមានវិសាលភាពធំ ក្រុមការងារបានទទួលយកមកពិនិត្យដោះស្រាយបន្ត ហើយនិងផ្ដល់ព័ត៌មានត្រឡប់ជូនប្រជាពលរដ្ឋជាបន្តទៀត។
