ភ្នំក្រាំងដីមាស ស្ថិតនៅក្នុងឃុំស្វាយជ្រុំ និងឃុំស្រែថ្មី ស្រុករលាប្អៀរ ខេត្តកំពង់ឆ្នាំង។ លាតសន្ធឹងតាមបណ្តោយផ្លូវជាតិលេខ៥ ក្នុងទិសដៅ​ពីទីរួមខេត្ត​ឆ្ពោះ​ទៅខេត្ត​ពោធិ៍សាត់ លើផ្ទៃដីប្រមាណ ២៨៨ហិចតា។ ភ្ញៀវទេសចរជាតិ អន្តរជាតិ បានមក​ទស្សនារមណីយដ្ឋាននេះរៀងរាល់ថ្ងៃ ដោយឡើងទៅលើកំពូលភ្នំតាមផ្លូវបេតុង។ នៅលើកំពូលភ្នំ ភ្ញៀវទេសចរនឹងបានឃើញ និងទស្ស-​នា វត្តធម្មវ័ន្ម ដែលវត្តនេះ​ជាទីនិយមសម្រាប់ពុទ្ធបរិស័ទជិតឆ្ងាយ និងភ្ញៀវទេសចរយ៉ាងច្រើនកុះករ។ ក្រៅពី​ធ្វើបុណ្យទានតាមព្រះពុទ្ធសាសនា ភ្ញៀវទេសចរក៏អាចដើរកម្សាន្ត និងគយគន់​ទេសភាពដ៏ស្រស់ត្រកាល នៃវាល​ស្រែ​​ពណ៌បៃតងស្រស់ ដើមត្នោត ផ្ទៃទឹកទន្លេសាប ភូមិឋានប្រជាពលរដ្ឋក្រុងកំពង់ឆ្នាំង និងស្រុករលាប្អៀរ ពីលើកំពូលភ្នំ ។បន្ថែមពីនេះ ភ្ញៀវទេសចរអាចជិះកង់កម្សាន្ត គយគន់ ទេសភាពតាមដងភ្នំក្រាំងដីមាស ទិញ​វត្ថុអនុស្សា​វរីយ៍ និង​​ទស្សនាការផលិតវត្ថុអនុស្សាវរីយ៍ផ្សេង​ៗ​ផលិតពីដីឥដ្ឋ នៅភូមិ​អណ្តូងឬស្សី ឃុំស្រែថ្មី ស្រុករលាប្អៀរ ខេត្តកំពង់ឆ្នាំង។ ក្រៅពីនោះ នៅភូមិទ្រា ឃុំស្រែថ្មី ស្រុក​​រលា​ប្អៀរ ខេត្តកំពង់ឆ្នាំង ដែលនៅមិនឆ្ងាយ​ពីភ្នំក្រាំង​ដី​មាស ភ្ញៀវទេសចរ​អាច​ធ្វើដំណើរតាម​រថយន្ត និងម៉ូតូកងបី ទៅទស្សនាប្រជាពលរដ្ឋឡើងត្នោត ដើម្បី​យក​ទឹកត្នោត​​រម្ងាស់ធ្វើជាស្ករ ឬល្ងូ។